काठमाडौं, जेठ ३० 
पूर्वानुमानमा आधारित पूर्वकार्य (Anticipatory Action) सम्बन्धी एसिया प्रशान्त स्तरीय तीन दिने संवाद मञ्च काठमाडौंमा सुरु भएको छ । उपप्रधानमन्त्री तथा गृहमन्त्री नारायणकाजी श्रेष्ठले कार्यक्रमको उद्घाटन गर्नुभयो । 
उद्घाटन कार्यक्रममा विशेष मन्तव्य राख्दै उपप्रधानमन्त्री तथा गृहमन्त्री श्रेष्ठले नेपालमा पूर्वानुमानमा आधारित पूर्वकार्यलाई विपद् जोखिम व्यवस्थापनमा अगाडिका लागि सोच्ने दृष्टिकोणलाई मलजल गर्ने लक्ष्यका साथ अगाडि बढाइरहेको बताउनुभयो । 
उपप्रधानमन्त्री श्रेष्ठले भन्नुभयो, 'हामी विपद् जोखिमको पूर्वानुमानलाई स्थानीय समुदायलाई प्रभाव सूचना संचारसँग जोडिरहेका छौं । रेडक्रस अभियानसँग मिलेर हामीले सबै स्थानीय तहमा स्वयंसेवक परिचालनको तयारी गरेका छौं । गोदाम प्रणालीले अग्रिम व्यवस्थापन गरिएका राहत सामग्रीका अलवा खोज तथा उद्दारका उपकरणहरु पछ्याउन सहयोग गर्छ ।' 
पूर्वानुमानमा आधारित पूर्वकार्यको दिगो बढोत्तरीमा जोड गरिरहँदा अझ वैज्ञानिक जोखिम-जानकारी भएको र नीतिमा आधारित पद्दतितर्फ अघि बढ्नुपर्नेमा उपप्रधानमन्त्री श्रेष्ठको जोड थियो । 
राष्ट्रिय विपद् जोखिम न्यूनीकरण तथा व्यवस्थापन प्राधिकरण र एन्टिसिपेसन हबले मानवीय क्षेत्रमा काम गर्ने विभिन्न संस्थाहरुको सहयोगमा संवाद मञ्च आयोजना गरेका हुन् ।  
कार्यक्रमको सहआयोजक एन्टिसिपेसन हबकी प्रमुख कारा डेभोना सिय्हानले यस्ता मञ्चहरुले मानिसहरुको जीवन जोगाउन र समाधानहरुको विकास गर्न एकअर्काका अनुभव साटासाट गर्न र सिक्न मद्दत गर्ने धारणा राख्नुभयो ।  
एसिया प्रशान्त स्तरको संवाद मञ्चको यो सातौं संस्करण हो । यस वर्षको नारा 'नयाँ उचाइमा पुग्दै: पूर्वानुमानमा आधारित पूर्वकार्यको दिगो बृद्धिका लागि मार्गहरुको खोजी' रहेको छ । 
कार्यक्रममा विभिन्न २५ देशका २०० सयभन्दा बढी सरकारी प्रतिनिधिहरु, पूर्वानुमानमा आधारित पूर्वकार्य अभ्यसाकर्ताहरु, साझेदार संस्थाका प्रतिनिधिहरुको सहभागिता छ । 
संवाद मञ्चमा पूर्वसूचना प्रणाली, यस क्षेत्रमा पूर्वानुमानमा आधारित पूर्वकार्यका लागि साझा मापदण्डहरु, सामाजिक पंजीकरणलगायतका विषयगत क्षेत्रहरुबारे छलफल हुनेछ । साथै, विभिन्न देशमा भएका असल अभ्यासहरुबारे अनुभव आदानप्रदान पनि गरिनेछ ।  
कुनै स्थानमा विपद्का कुनै घटना हुने पूर्वानुमान भइसकेपछि गरिने अग्रिम उद्दार तथा राहतसहितका क्रियाकलापलाई पूर्वानुमानमा आधारित पूर्वकार्य (Anticipatory Action) भनिन्छ ।